خیبرپختونخوا کے وزیر صحت تیمور سلیم خان جھگڑا نے کہا ہے کہ ڈاکٹرز, پیرامیڈیکس، پولیس، ریسکیو اور رضاکار ہمارے ہیروز ہیں جو کہ کورونا وباء سے پیدا شدہ صورت حال میں فرنٹ لائن پر فرائض سر انجام دے رہے ہیں۔ صوبائی وزیر صحت کا اپنے ایک وڈیو پیغام میں کہنا تھا کہ صوبے میں صحت عملے کے لیے گزشتہ چند دنوں میں 80 کروڑ کا حفاظتی سامان و آلات خریدے گئے ہیں۔ انہوں نے یہ بھی واضح کیا کہ یہ حفاظتی سامان ہر ایک کے لیے اور ہر وقت استعمال کے لیے نہیں بلکہ اس صحت عملے کے لیے ہے جو براہ راست کورونا وائرس سے متاثرہ مریضوں کی نگرانی پر مامور ہوں۔ صوبائی وزیر نے کہا کہ مخصوص حفاظتی ماسک بھی صرف صحت عملے کے لیے ہیں جو کہ کورونا وائرس سے متاثرہ مریضوں کا علاج معالجہ کرتے ہیں۔ صوبائی وزیر کا اپنے ایک ٹوئیٹر پیغام میں کہنا تھا کہ محکمہ صحت خیبرپختونخوا اور عالمی بینک مل کر صوبے میں کورونا وباء سے نمٹنے کے لیے حکمت عملی ترتیب دے رہے ہیں جس میں پہلی ترجیح جلد از جلد صحت سہولیات اور طبی آلات کی فراہمی ہے۔ صوبائی وزیر نے کہا کہ ملٹی ڈونرز ٹرسٹ فنڈز (MDTF) کے تعاون سے جاری پروگرام اکنامک ریوٹلائزیشن آف خیبر پختونخوا (ERKF) کے تحت صوبے کے لیے مزید 120 وینٹی لیٹرز اور 2 لاکھ 10 ہزار ماسکس خریدے جا رہے ہیں۔ جس سے صوبے کی کورونا وباء سے نمٹنے کی استعداد کار میں اضافہ ہوگا۔
