کے پی فوڈ اتھارٹی ٹیموں نے کینٹ مجسٹریٹ مس وزیر کیساتھ مشترکہ کاروائی کرتے ہوئے پشاور کینٹ ایریا میں دودھ کے دوکانوں کی چیکنگ کی اور دودھ میں ملاوٹ اور معیار برقرار نہ رکھنے پر چھ دوکانیں سیل کردیں۔ ڈائریکٹر آپریشنز کے پی فوڈ اتھارٹی ڈاکٹر عظمت وزیر کیمطابق کینٹ انتظامیہ کیساتھ یہ پہلی مشتکہ کاروائی تھی جس میں ان کو تکنیکی معاونت فراہم کی گئی اور دودھ کی چیکنگ کیلئے موقع پر تجزیہ کیا گیا۔ان کا مزید کہنا تھا کہ اسسٹنٹ ڈائریکٹر اسد علی کی سربراہی میں تین رکنی تکنیکی ٹیم نے اس مشترکہ آپریشن میں حصہ لیتے ہوئے دو ہزار لیٹر ملاوٹی دودھ موقع پر تلف کیا اور چار دوکاندار بھی گرفتار کئے۔ ڈائریکٹر آپریشنز کا مزید کہنا تھا کہ فوڈ اتھارٹی ٹیمیں ضلعی انتظامیہ سمیت دیگر مختلف محکموں کو تکنیکی معاونت فراہم کرتی ہیں اور جہاں بھی ضرورت ہو تو فوڈ اتھارٹی کی ٹیمیں خدمات کی فراہمی کیلئے تیار رہتی ہیں۔ ان کا یہ بھی کہنا تھا کہ عوام کو صاف اور محفوظ خوراک کی فراہمی کیلئے کینٹ انتظامیہ کیساتھ مشترکہ آپریشنز جاری رکھیں گے۔
