خیبر پختونخوا ہاوسنگ فاونڈیشن کے تحت رہائشی پلاٹوں اور گھروں کی فراہمی کےلئے تمام سرکاری ملازمین کی تنظیموں کے ساتھ مشاورت کےجائے اور ملازمین کی تجاویز کی روشنی میں کام کو آگے بڑھایا جائے یہ مشاورتی عمل ایک ماہ کے اندر مکمل کیا جائے گا۔ اس امر کا فیصلہ چیف سیکرٹری خیبر پختونخوا ڈاکٹر کاظم نیاز کی سربراہی میں سرکاری ملازمین کیلئے خیبر پختونخوا ہاوسنگ فاونڈیشن کے قیام کیلئے منعقدہ اجلاس میں ہوا۔ا اجلاس میں سیکرٹری فاونڈیشن حسن محمود یوسفزئی ،سینئر ممبر بورڈ آف ریونیو محمداکبرخان، سیکرٹری اسٹبلیشمنٹ جمال الدین شاہ ، سیکرٹر ی ایڈمینسٹر یشن ظاہر شاہ، سابقہ سیکرٹر ی عطاالرحمان ، سابقہ سیکرٹر ی یوسف جمال، ڈائریکٹر جنرل پی ایچ اے عمران وزیر اور مختلف کیڈرز کے سرکاری ملازمین کے نمائندہ گان ایڈیشنل سیکرٹری افسر علی شاہ، کاشف اقبال اور ظفر یوسفزئی نے شرکت کی ۔ سیکرٹر ی ہاوسنگ حسن محمود یوسفزئی نے چیف سیکرٹری کو بریفنگ دیتے ہوئے بتایا کہ خیبر پختونخوا ہاوسنگ فاونڈیشن کے لیے اب تک تقریبا 88 ہزار ملازمین پورے صوبے سے اپلائی کر چکے ہیں جس کی سکروٹنی بعد میں کی جائے گی ۔ سیکرٹری ہاوسنگ نے کہا کہ خیبر پختونخوا ہاوسنگ فاونڈیشن کے لئے 30 سالوں میں 96 ہزار کنال زمین درکار ہے اور اس تناسب سے آئندہ 10سالوں میں 16 ہزار کنال زمین درکار ہو گی۔ حسن محمود یوسفزئی نے کہا کہ سب سے زیادہ سرکاری ملازمین نے پشاور میں پلاٹ اور گھر کے لیے اپلائی کیا ہے اس لیے پشاور میں ہاوسنگ فاونڈیشن کے لئے سب سے زیادہ زمین کی ضرورت ہے اور مختلف اضلاع میں زمین کی نشاندہی کی گئی ہے۔ اجلاس میں بتایا گیا کہ ہاوسنگ منصوبوں میں قبائلی اضلاع کے سرکاری ملازمین کو نظرانداز نہیں کیا جائے گا ۔اجلاس میں بتایا گیا کہ تمام پلاٹس اور گھر وں کو بغیر نفع ونقصان پالےسی کے تحت الاٹ کئے جائیں گے اور ملازمین آسان اقساط میں ادائیگی کر سکیں گے۔ حسن محمود یوسفزئی نے اجلاس کو بتایا کہ خیبر پختونخوا ہاوسنگ فاونڈیشن سے مختلف مراحل میں زیادہ سے زیادہ سرکاری ملازمین کو مستفید کیا جائے گا تاکہ تمام ملازمین کو رہائشی سہولیات اسانی سے مل سکیں۔ چیف سیکرٹری نے ہاوسنگ فاونڈیشن کے قیام کیلئے اٹھائے جانے والے مثبت اقدامات پر سیکرٹری ہاوسنگ حسن محمود یوسفزئی کی کارکردگی کو سراہا۔
