وزیراعلی خیبرپختونخوا محمود خان نے کہا ہے کہ صوبائی حکومت صوبے میں معیشت کی بہتری اور مجموعی ترقی کے لئے عملی اور ترجیحی اقدامات کر رہی ہے۔ صنعت اور تجارت کے فروغ کے لیے صوبے میں چھوٹے بڑے تمام صنعتی زون کو تیز رفتاری سے مکمل کیا جارہا ہے، جس کی تکمیل سے صوبے میں نہ صرف معیشت مستحکم ہوگی بلکہ عوام کو روزگار کے بہتر مواقع بھی میسر آسکیں گے۔ وزیراعلی نے کہا ہے کہ موجودہ صوبائی حکومت عوام کو بہتر خدمات کی فراہمی یقینی بنانے کے لئے اداروں میں مثبت اصلاحات بھی لارہی ہیں۔ تحریک انصاف کی حکومت نہ صرف معیشت کو بہتر کرنے کے لیے کوشاں ہیں بلکہ اس کے ساتھ ساتھ عوام کی فلاح وبہبود پر بھی توجہ مرکوز کی ہوئی ہیں۔ نئے ضم شدہ قبائلی اضلاع میں نوجوانوں کو بلاسود قرضوں کی فراہمی یقینی بنائی جارہی ہے تاکہ نوجوانوں کو نہ صرف روزگار کی فراہمی ممکن بنائی جائے بلکہ قبائلی عوام کی محرومیوں کا ازالہ بھی ممکن ہوسکے۔ان خیالات کا اظہار وزیراعلیٰ نے سپیکرصوبائی اسمبلی مشتاق غنی سے وزیراعلیٰ ہاﺅس پشاور میں ملاقات کے دوران کیا ہے۔ملاقات کے دوران وزیراعلیٰ نے کہا ہے کہ صوبے میں دیگر چھوٹے بڑے اکنامک زونز سمیت رشکئی سپیشل اکنامک زون کی تیز رفتار ترقی حکومت کی ترجیحات میں شامل ہے ، اس مقصد کیلئے تمام سٹیک ہولڈرز کو اپنی ذمہ داریاں بروقت پوری کرنے کی ضرورت ہے ۔ اُنہوں نے کہا ہے کہ بیرونی سرمایہ کاری کو صوبے میں مدعو کیا جارہا ہے جس سے صوبہ خیبرپختونخوا میں ترقی کی راہ ہموار ہونے میں مدد ملے گی۔اُنہوںنے واضح کیا ہے کہ صوبائی حکومت رشکئی اسپیشل اکنامک زون کو جلد فعال بنانے کیلئے تمام ممکن وسائل بروئے کار لارہی ہے۔
