سینئر وزیر برائے سیاحت عاطف خان نے گزشتہ روز وزیر اعظم سیکرٹریٹ میں وزیراعظم عمران خان سے ملاقات کی اور صوبے کی سیاسی صورتحال، ضم شدہ اضلاع سمیت محکمہ سیاحت کے حوالے سے تفصیلی گفتگو ہوئی۔سینئر وزیر نے وزیراعظم کو نیشنل گیمز اور محکمہ سیاحت میں کی گئی اصلاحات کے حوالے سے بریفنگ دیتے ہوئے کہا کہ صوبے میں دس سال بعد نیشنل گیمز کا انعقاد کیا گیا جسمیں پورے ملک سے 10 ہزار کھلاڑیوں نے حصہ لیا۔نیشنل گیمز میں میڈل جیتنے والے صوبے کے کھلاڑیوں کے لئے ماہانہ اعزازیہ کا پروگرام شروع کیا گیا ہے، گولڈ میڈل جیتنے والے کھلاڑیوں کو 20 ہزار، سلور کو 15 ہزار اور براونز میڈل جیتنے والے کھلاڑیوں کو 10 ہزار ماہانہ معاوضہ دیا جارہا ہے، کھیلوں کے فروغ کے لئے 100 کوچز بھرتی کئے جارہے ہیں، ضم شدہ قبائلی آضلاع میں تقریبا دس ارب روپے کے مختلف کھیلوں کی سکیموں کی منظوری دی جا چکی ہے، سینئر وزیر نے کہا کہ
صوبے میں 4 نئے سیاحتی زونز بنانے سمیت مذہبی سیاحت کے فروغ پر کام جاری ہے،بدھ مت کے مذہبی پیشوا مختلف ممالک سے صوبے کا رخ کررہے ہیں اور اپنے مذہبی رسومات ادا کررہے ہیں، وزیراعظم عمران خان نے سینئر وزیر عاطف خان کو نیشنل گیمز کے کامیاب انعقاد پر مبارک باد دی اور کھیلوں کے فروغ کے لئے مزید اقدامات کی ہدایت کی۔وزیراعظم عمران خان نے کہا کہ کھیل اور سیاحت کے ذریعے ملک کا بہتر امیج دنیا کے سامنے لایا جاسکتا ہے،دونوں شعبوں کے ذریعے بے روزگاری کا خاتمہ اور معیشت کو مضبوط بنایا جاسکتا ہے، وزیراعظم عمران خان نے سینئر وزیر کو سیاحت اور کھیلوں کے فروغ کے لئے تمام منصوبوں پر کام تیز کرنے کی ہدایت کرتے ہوئے وفاقی سطح پر تمام رکاوٹیں دور کرنے کی یقین دہانی کرائی۔
