مشیرتعلیم خیبرپختونخوا ضیاء اللہ خان بنگش نے کہاہے کہ محکمہ تعلیم ڈیجٹلائزیشن پالیسی پرعمل پیراہے۔ ای۔ٹرانسفر پالیسی کی کامیاب آغازکے بعد محکمہ تعلیم میں اب تمام بھرتیا ای۔ریکروٹمنٹ کے ذریعے ہوگی جس میں ہمیں آئی ٹی بورڈ کی تکنیکی معاونت حاصل ہوگی۔ طلباء کو آئی ٹی سے روشناس کرانے اور دورجدید کے تقاضوں سے ہم آہنگ تعلیم وتربیت کی فراہمی کی غرض سے محکمہ تعلیم نے سرکاری سکولوں میں 1300 جدید آئی ٹی لیبزقائم کی ہیں جبکہ دوسر فیز میں ان کی تعداد میں مزید اضافہ ہوگا۔
وہ پشاور کے ایک مقامی ہوٹل میں محکمہ تعلیم خیبرپختونخوا اور مائیکروسافٹ کے باہمی اشتراک سے منعقدہ سیمینار سے بطور مہمان خصوصی خطاب کررہے تھے۔ وزیراعلی کے معاون خصوصی برائے سائنس و انفارمیشن ٹیکنالوجی کامران خان بنگش نے بھی سیمینار سے خطاب کیا۔ جبکہ سیکرٹری ہائرایجوکیشن ارشد خان اور تمام اضلاع کے ڈسٹرکٹ ایجوکیشن آفیسرز اور طلباء وطالبات بھی اس موقع پر موجود تھے۔ مشیر تعلیم ضیاء اللہ خان بنگش نے کہاکہ ٹیکنالوجی کی بدولت ہم سرکاری کی کامیاب مانیٹرنگ کررہے ہیں جس کی بدولت اساتذہ اور طلباء کی حاضری اور کارکردگی میں بہتری کیساتھ ساتھ سکولوں کو سہولیات کی فراہمی بھی یقینی بنائی جارہی ہے۔ مشیر تعلیم نے ارلی ایج پروگرامنگ کے حوالے سے کہاکہ امسال منعقدہ پاشااورایشیاء پیسفک مقابلوں میں ہمارے سرکاری سکولوں کے طلباء نے پہلی تین پوزیشنیں حاصل کئے جو کہ پورے صوبے کیلئے ایک منفرد اعزاز ہے۔ ضیاء اللہ خان بنگش نے کہاکہ سائنس و انفارمیشن ٹیکنالوی اورمحکمہ تعلیم کے باہمی اشتراک سے ہم ایسے پروپوزل پرکام کررہے ہیں کہ ہم اپنے طلباء کو معیاری تعلیم کے ساتھ ساتھ ٹیکنیکل تعلیم بھی دیں تاکہ ہمارے طلباء فارغ التحصیل ہوکر ٹیکنیکل ہنر کی بدولت بھی روزگار حاصل کرسکیں۔ سیمینار سے خطاب کرتے ہوئے وزیراعلی کے معاون خصوصی برائے سائنس وانفارمیشن ٹیکنالوجی کامران بنگش نے کہاکہ آئی ٹی بورڈ اور محکمہ تعلیم کے اشتراک سے شروع کردہ پروگرام ارلی ایج پروگرامنگ کی بدولت ہم طلباء کو کم عمری میں ہی پرواگرامنگ سے روشناس کرارہے ہیں۔ جبکہ ہائی لیول پر ان کی بہترین راہنمائی اور تربیت کیلئے پروگرام بنائے جارہے ہیں۔ انہوں نے کہاکہ ہم ای۔ریکروٹمنٹ پالیسی کی بدولت بہت کم وقت میں پیپرز کی تیاری، امتحانات کے انعقاد اور نتائج جاری کرسکیں۔ جس سے گورننس مزیدمضبوط ہوگی۔ مشیر تعلیم ضیاء اللہ خان بنگش نے مائیکروسافٹ ادارے کی محکمہ تعلیم کیساتھ اساتذہ اورطلباء کو تکنیکی معاونت میں شراکت داری کی فراہمی پران کا شکریہ ادا کرتے ہوئے کہاکہ ان کے اس کاوش کی بدولت طلباء کو سرٹیفکیٹس میں آسانی کیساتھ ساتھ وہ ٹیکنالوجی کے میدان میں مزید کامیابیاں حاصل کرسکیں گے۔ جس سے ملازمتوں کے حصول میں آسانی کیساتھ ساتھ بین القوامی سطح پر اپنا لوہا منواسکیں گے۔ اساتذہ کی تربیت کے حوالے سے مشیر تعلیم نے کہاکہ ہم اپنے اساتذہ کو ٹیبلٹ بیسڈ تربیت فراہم کررہے ہیں اور ترپیت کے اس عمل کو قبائلی اضلاع تک بھی وسعت دی جارہی ہے۔ سیمینار کے اختتام پر پاشا اور ایشیاء پیسفک مقابلوں میں پوزیشنز حاصل کرنے والے طلباء کو شیلڈز بھی دیے گئے۔
