وزیرِ اعلیٰ خیبر پختونخوا کے معاونِ خصوصی برائے صنعت و تجارت عبدالکریم خان نے تین کروڑ اسی لاکھ روپے کی لاگت سے مکمل ہونے والے گیس فراہمی منصوبے کا با ضابطہ افتتاح کر دیا جس سے بنوں سمال انڈسٹریل اسٹیٹ کو گیس فراہم کی جائے گی۔ افتتاحی تقریب میں ممبر صوبائی اسمبلی شاہ محمد وزیر، ممبر صوبائی اسمبلی پختونیار خان، سابقہ قومی اسمبلی کے امیدوار مولانا نسیم علی شاہ،صوبائی صدر پاکستان تحریکِ انصاف سکندر حیات خان، مینیجنگ ڈائریکٹر ایس آئی ڈی بی غضنفرکے علاوہ مختلف مکاتبِ فکر کے لوگوں اور عام عوام نے کثیر تعداد میں شرکت کی۔ افتتاح کے بعد جلسہ عام سے خطا ب کر تے ہوئے عبدالکریم خان نے کہا کہ صوبائی حکومت جنوبی اضلاع کی تیز ترقی کیلئے اقدامات اُٹھا رہی ہے۔ طورخم گیٹ کے بعدبہت جلد غلام خان گیٹ تجارت کیلئے کھول دی جائے گی جس سے جنوبی اضلاع میں ترقی او ر خوشحالی کا ایک نیا دور شروع ہوگا۔ انہوں نے کہا کہ وہ بہت جلد نئے ضم شدہ قبائلی اضلا ع کا دورہ کرینگے اور قبائلی اضلاع میں انڈسٹریل زون کا افتتاح کرینگے۔ انہوں نے واضح کیا کہ قبائلی اضلاع میں تاریکی کا دور ختم ہو چکا ہے اور اب ترقی و خوشحالی ان کا مستقبل ہے۔ انہوں نے کہا کہ پاکستان تحریکِ انصاف نے ایزی لوڈ اور چندہ کلچر کا خاتمہ اپنی انتھک محنت اور انصاف پر مبنی اقداما ت کے ذریعے کیا اور آئندہ بھی کسی کو بھی کرپشن اور ناانصافی کا موقع نہیں دیا جائے گا۔ جنوبی اضلاع کی ترقی کے حوالے سے گفتگو کر تے ہوئے انہوں نے کہا کہ پشاور تا ڈی آئی خان موٹر وے کی تعمیر سے تمام جنوبی اضلاع کو ملک کی شاہراہوں سے منسلک کر دیا جائے گا جس سے اِن اضلاع میں ترقی کا نیا دور شروع ہو جائے گا۔ انہوں نے واضح کیا کہ پاکستان تحریکِ انصاف صوبے کے پسماندہ علاقوں کو ترقی یافتہ اضلاع کے برابر لانا چاہتی ہے کیونکہ حقیقی ترقی اس وقت تک ممکن نہیں جب تک صوبے کے تمام اضلاع کی یکساں ترقی یقینی نہیں بنا دی جاتی۔
