خیبرپختونخوا کے وزیر بلدیات، الیکشنز و دیہی ترقی شہرام خان ترکئی نے کہا کہ تحصیل و ٹاؤن مونسپل ایڈمنسٹریشنز میں اصلاحات کا عمل جاری ہے۔ صوبے کی تمام ٹی ایم ایز کی کارکردگی جانچنے کے لیے کِی پرفارمنس انڈیکیٹرز (کے پی آئز) متعارف کرا دئیے گئے ہیں جن میں واٹر اینڈ سینی ٹیشن، صفائی، شجرکاری اور سالڈ ویسٹ مینجمنٹ شامل ہیں۔ ملازمین کی تنخواہیں ان کی کارکردگی سے منسلک کی جائیں گی۔ صوبائی وزیر بلدیات نے ان خیالات کا اظہار لوکل کونسل بورڈ کے اجلاس کی صدارت کرتے ہوئے کیا۔ جس میں سیکرٹری ایل سی بی خضر حیات خان اور آئی ٹی سے متعلق افسران نے شرکت کی۔ اجلاس میں سیکرٹری ایل سی بی خضر حیات خان نے ڈیش بورڈ کے حوالے سے بریفنگ دی۔ اجلاس میں بتایا گیا کہ ڈیش بورڈ پر صوبے کی تمام ٹی ایم ایز کا ڈیٹا موجود ہوگا۔ ٹی ایم ایز ملازمین کی حاضری سے لے کر ٹینڈرز کی تفصیلات تک سب معلومات اس ڈیش بورڈ پر دیکھی جا سکیں گی۔ صوبائی وزیر بلدیات نے متعلقہ افسران کو ہدایت کی تمام ملازمین کی ترقی کو ان کی حاضری اور کارکردگی سے منسلک کیا جائے۔ انہوں نے یہ بھی کہا کہ افسران ہر ٹی ایم اے کا خود دورہ کریں اور ہر ملازم کا شناختی چیک کریں تاکہ گھوسٹ ملازمین کا پتہ چل سکے۔ اسی طرح ہر ٹی ایم اے کے تمام ملازمین کا ڈیٹا ڈیش بورڈ پرڈالا جائے گا۔ اجلاس میں بتایا گیا کہ صوبے کی 93 میں سے 22 ٹی ایم ایز میں مکمل بائیو میٹرک حاضری نظام نصب ہو چکا ہے جبکہ دیگر میں بھی ایک ماہ کے اندر نصب کر دیا جائے گا۔ ڈیش بورڈ پر کسی بھی منصوبے کے لیے جاری قسط وار فنڈز کی تفصیلات بھی دیکھی جا سکیں گی۔ صوبائی وزیر نے ایل سی بی افسران کو ہدایت کی کہ جدید بائیو میٹرک حاضری نظام نصب کیا جائے اور بری کارکردگی کا مظاہرہ کرنے والے ملازمین سے سختی سے نمٹا جائے۔ وزیر بلدیات نے کہا کہ ڈیش بورڈ سے ٹی ایم ایز سے متعلق تمام تر معلومات ایک جگہ سے میسر ہوں گی اور کارکردگی اعشاریوں کا جائزہ بھی لیا جا سکے گا۔
